Presidentja Gordana Siljanovska Davkova sot bisedoi me Nikica Mojsovska-Blazeski, drejtoreshën ekzekutive të “Maqedonia 2025”, për përforcimin dhe thellimin e marrëdhënieve me diasporën.
Në takim, drejtoresha e njohu Presidenten me konceptin e samitit “Maqedonia 2025”, si një mundësi e rrallë për rrjetëzimin, vendosjen e partneriteteve të reja dhe bashkëpunimin me investitorët potencialë.
Bashkëbiseduesit u dakorduan se diaspora duhet dhe mund të jetë faktor dhe aktor i rëndësishëm në ekonominë, politikën, arsimin, shkencën, kulturën dhe sportin maqedonas. Ato e theksuan nevojën për integrimin e diasporës në të gjitha sferat dhe proceset maqedonase.
Drejtoresha e përshëndeti idenë e krijimit të një Këshilli kombëtar të Diasporës, i cili duhet të bashkojë profile të ndryshme dhe personalitete prestigjioze e të dëshmuara, duke shprehur vullnetin për bashkëpunim. U theksua domosdoshmëria e krijimit dhe mbajtjes së një baze të dhënash të integruar, përkatësisht të një regjistri të më të suksesshmëve.
Presidentja dhe drejtoresha u dakorduan se vendosja e lidhjeve intensive të diasporës dhe Këshillit Social-Ekonomik në Qeveri, kurse veçanërisht me Agjencinë e Emigracionit, është me rëndësi të jashtëzakonshme për komunikim të suksesshëm.
Të dyja konsiderojnë se deburokratizimi i procedurave për marrjen e dokumenteve të udhëtimit dhe dokumenteve të tjera maqedonase, si dhe përmirësimi i shërbimeve diplomatike dhe konsullore, janë hap i domosdoshëm për komunikim të vazhdueshëm të atdheut me diasporën.
Gjithashtu, plotësimi i regjistrave të më të suksesshmëve dhe më të njohurve globalisht do të mundësojë një pasqyrë të kapitalit të vlefshëm shoqëror që kemi në diasporë, i nevojshëm për sfidat e pandashme nga transformimi digjital dhe inteligjenca artificiale.
Sipas tyre, është koha që të shprehim respektin e duhur duke u dhënë tituj dhe çmime për ekselencë dhe merita ndaj atdheut atyre që kanë kontribuar në afirmimin e tij të pamohueshëm në mbarë botën.
Presidentja shprehu gatishmërinë që këtë vit të jetë mbështetëse e “Kampit të Ohrit për Ekselencë të Teknologjisë së Lartë” për fëmijët nga vendi dhe diaspora, me dëshirën e sinqertë për të mbështetur kreativitetin, inteligjencën, dijen dhe inovacionin e tyre.
