Në këtë takim u bisedua mbi bashkëpunimin e institucioneve të Maqedonisë me Organizatën Ndërkombëtare për Migrim dhe mundësitë për thellimin e tij, mbi fushat në politikën migratore të cilave duhet t’u jepet prioritet, si dhe për iniciativat dhe aktivitetet e ardhshme të organizatës që planifikohen për vendin tonë.
Duke shprehur mirënjohje për angazhimin dhe mbështetjen e vazhdueshme nga Organizata Ndërkombëtare për Migrim duke filluar nga viti 1999, Presidentja Siljanovska Davkova shprehu gatishmërinë për të vazhduar partneritetin e ndërsjellë në ngritjen e kapaciteteve për menaxhimin e migracionit, kontrollin e kufijve dhe mbështetjen e grupeve të cenueshme.
Në këtë takim u shkëmbyen mendime mbi mundësitë e vazhdimit të bashkëpunimit në lidhje me programet e migracionit për motive punësimi, të cilat lehtësojnë integrimin e migrantëve dhe rrisin kontributin e tyre në zhvillimin kombëtar, si dhe për mundësitë e përforcimit të bashkëpunimit në fushën e ofrimit të shërbimeve shëndetësore për emigrantët.
Në këtë drejtim u shpreh edhe interesimi për bashkëpunim në planin e strategjive të qëndrueshme për zbutjen e rreziqeve nga migrimi klimatik dhe menaxhimin e migracionit të shkaktuar nga ndryshimet klimatike.
Në takim Presidentja u informua edhe mbi rolin e Organizatës Ndërkombëtare për Migrim në parandalimin e ekstremizmit të dhunshëm dhe programet për riintegrimin dhe rehabilitimin e luftëtarëve të huaj terroristë të kthyer dhe familjeve të tyre.
Presidentja e rikonfirmoi angazhimin e vendit në menaxhimin e migracionit legal dhe ilegal, në promovimin e kapaciteteve institucionale dhe harmonizimin e legjislacionit me standardet ndërkombëtare, si dhe përpjekjet për reagimin dhe menaxhimin e duhur të krizave në nivel kombëtar dhe rajonal.
