Presidentja Gordana Siljanovska Davkova sot e mirëpriti ambasadoren e Republikës së Greqisë, Sofija Filipidu.
Në këtë takim u diskutua mbi marrëdhëniet e përgjithshme bilaterale midis dy vendeve, potencialet dhe mundësitë për avancimin e bashkëpunimit, në funksion të ndërtimit të fqinjësisë së mirë të bazuar në besimin dhe mirëkuptimin reciprok. Në këtë drejtim, Presidentja shprehu pritshmërinë e saj për mbështetjen e Greqisë për politikën e zgjerimit dhe aspiratat tona evropiane.
Në takimin me ambasadoren greke u shkëmbyen mendime edhe mbi Marrëveshjen e Prespës dhe zbatimin e saj, ku Presidentja vuri në dukje rëndësinë e zbatimit të vazhdueshëm të saj nga të gjitha palët që u angazhuan për të.
Në takim, Presidentja Siljanovska Davkova e rikonfirmoi përkushtimin e saj për zhvillimin e mëtutjeshëm të partneritetit dhe miqësisë së sinqertë me Greqinë. Ajo e theksoi bashkëpunimin e mirë në fushën e mbrojtjes, duke e theksuar rëndësinë e përforcimit të bashkëpunimit ekonomik, shkëmbimit tregtar, lidhjes infrastrukturore, si dhe bashkëpunimit në fushën e arsimit, kulturës dhe turizmit, si sfida në të cilat duhet të fokusohemi bashkërisht në interes të mirëqenies dhe afrimit të popujve të dy vendeve.
