Presidentja Gordana Siljanovska Davkova sot e mirëpriti ambasadorin e Republikës Socialiste të Vietnamit, Do Hoang Long.
Në këtë takim u bisedua mbi marrëdhëniet bilaterale midis dy vendeve të cilat i lidh një miqësi shumëvjeçare dhe u shpreh nxitja për përparimin dhe thellimin e mëtejshëm të bashkëpunimit të ndërsjellë në shumë fusha.
Bashkëfolësit e theksuan ekonominë si një nga sferat prioritare të bashkëpunimit bilateral dhe shprehën interesim për përparimin e saj duke ndërmarrë aktivitete dhe projekte specifike ekonomike, si themelimi i Komisionit të Përbashkët Ekonomik, organizimi i një seminari ekonomik në Shkup nga Ambasada e Vietnamit në drejtim të nxitjes së tregtisë dhe investimeve midis dy shteteve.
Në takim u bisedua edhe mbi zgjerimin e bashkëpunimit bilateral edhe në fushat e kulturës, turizmit, arsimit dhe shkencës, nëpërmjet shkëmbimit të studentëve dhe profesorëve, si dhe për zgjerimin e kornizës së dakorduar në sferën e arsimit dhe shkencës, si dhe në bashkëpunimin midis ministrive të Punëve të Jashtme të të dy vendeve.
Të dy bashkëfolësit konstatuan se ekziston bashkëpunim i mirë në planin multilateral dhe shprehën pritjen se ky bashkëpunim dhe kjo mbështetje e ndërsjellë në organizatat ndërkombëtare do të vazhdojë sidomos në suazat e OKB-së dhe në Organizatën ndërkombëtare të Frankofonisë.
