Presidentja Gordana Siljanovska Davkova priti delegacion të Aleancës maqedonase për integrime evropiane nga Republika e Shqipërisë, të kryesuar nga kryetari i saj, Vasil Sterjovski.
Përfaqësuesit e partisë së vetme politike të maqedonasve në Shqipëri shprehën shqetësim serioz për gjendjen e minoritetit maqedonas, duke theksuar se ata po përballohen me propagandë dhe përpjekje asimilimi të cilat e kërcënojnë identitetin e tyre kombëtar dhe kulturor.
Ata shprehën pakënaqësi për qëndrimin e institucioneve shqiptare ndaj tyre, si në nivel shtetëror ashtu edhe në atë lokal, duke theksuar se mbrojtja dhe mbështetja e pamjaftueshme e vendos këtë bashkësi në një pozitë të pasigurt të ekspozuar ndaj presioneve të përhershme.
Kërkuan pjesëmarrje më të madhe nga pushtetet maqedonase, si dhe ndihmën e tyre për tejkalimin e problemeve të mëdha me të cilat ballafaqohen. Ata e shprehën hapur qëndrimin e tyre për mungesën e një strategjie shtetërore për mbrojtjen e pozitës së maqedonasve në Shqipëri.
Në këtë bisedë, ata e informuan Presidenten mbi iniciativat e deritanishme të partisë, si dhe për aktivitetet e planifikuara, që synojnë përforcimin e identitetit të tyre kombëtar dhe kulturor.
Presidentja Siljanovska-Davkova fillimisht shprehu mirëkuptimin për përkeqësimin e gjendjes së minoritetit maqedonas në Shqipëri.
Ajo e riafirmoi nevojën për një qasje strategjike në zgjidhjen e statusit dhe mbrojtjen e të drejtave të minoritetit maqedonas në Shqipëri, në përputhje me dokumentet evropiane dhe ndërkombëtare.
