Presidentja Gordana Siljanovska-Davkova pranoi letrat kredenciale të ambasadorit të sapoemëruar të jashtëzakonshëm dhe fuqiplotë të Emirateve të Bashkuara Arabe me seli në Romë, Abdulla Ali Atek Obaid Alsubusi.
Duke përcjellë përshëndetjet e Presidentit të Emirateve, Sheikut Mohamed bin Zajed Al Nahajn, ambasadori theksoi se në punën e tij do të përqendrohet në ruajtjen e marrëdhënieve të mira politike, si dhe në zgjerimin dhe thellimin e marrëdhënieve në sfera të tjera.
Siljanovska-Davkova tha se akti i dorëzimit të letrave redencialeve është fillimi i një kapitulli të ri në forcimin dhe promovimin e mëtejshëm të marrëdhënieve miqësore, të cilat të dy vendet i kanë kultivuar për tri dekada. Ajo theksoi interesin për intensifikimin e bashkëpunimit në fushat ekonomike, tregtare dhe të investimeve dhe shprehu besimin se biznesmenët dhe sipërmarrësit nga Emiratet e Bashkuara Arabe do të përfitojnë nga mundësitë e investimit që Qeveria maqedonase u ofron investitorëve të huaj. Po aq i rëndësishëm, sipas saj, është bashkëpunimi në: arsim, shkencë, kulturë, shëndetësi, turizëm dhe bujqësi, si dhe kontaktet midis komuniteteve të biznesit dhe dhomave të tregtisë.
Duke diskutuar tregtinë e ndërsjellë dhe investimet direkte nga Emiratet e Bashkuara Arabe, të cilat arritën në 3,11 milionë dollarë në vitin 2023, Siljanovska-Davkova tha se marrëdhëniet ekonomike nuk korrespondojnë me marrëdhëniet e shkëlqyera politike dhe se të dy vendet duhet të punojnë për harmonizimin e tyre.
Në takim bashkëbiseduesit ranë dakord që me hapjen e një ambasade të Emirateve në vendin tonë, e cila do të përfshinte edhe disa vende të rajonit, do të përmirësohej mjedisi institucional për bashkëpunim.
Duke i uruar suksese në kryerjen e detyrës së tij prestigjioze dhe të përgjegjshme si ambasador, Presidentja i dërgoi nëpërmjet tij një ftesë presidentit të Emirateve dhe sundimtarit të Abu Dabit, Sheikut Mohamed bin Zajed Al Nahajn Sheikh, për të vizituar vendin tonë.
