Presidentja Gordana Siljanovska Davkova sot në takim lamtumire e mirëpriti ambasadorin e Indonezisë, SH.T. Z. Ivan Bogananta, duke e falënderuar për kontributin në ruajtjen e marrëdhënieve stabile dhe miqësore midis dy vendeve.
Në këtë takim bashkëbiseduesit shprehën kënaqësinë për zhvillimin bilateral, duke thënë se parakusht i rëndësishëm për thellimin e mëtejshëm të tij është intensifikimi i dialogut politik nëpërmjet shkëmbimit të vizitave në nivelin më të lartë.
Duke pasur parasysh se Indonezia është një nga ekonomitë më të mëdha në Azinë Juglindore, Presidentja e përshëndeti iniciativën për negociata për Marrëveshjen e Tregtisë së Lirë midis dy vendeve, si një hap drejt rritjes së shkëmbimit tregtar. Duke i theksuar përparësitë e vendit tonë nëpërmjet prizmit të vendndodhjes strategjike dhe qasjes në tregun evropian, ajo e konfirmoi interesin për përforcimin e partneritetit ekonomik dhe hapjen ndaj investimeve indoneziane.
Gjithashtu, Presidentja i theksoi kulturën, shkencën, arsimin dhe turizmin si fusha bashkëpunimi, për realizimin e të cilave nevojitet përmirësimi i kuadrit ligjor dhe lehtësimi i regjimit të vizave për qytetarët.
Duke e theksuar rolin konstruktiv të Indonezisë në skenën globale, Presidentja Siljanovska Davkova shprehu shpresën për vazhdimin e bashkëpunimit të suksesshëm në nivel multilateral në Kombet e Bashkuara. Duke theksuar se multilateralizmi u lejon vendeve të vogla dhe të mesme të marrin pjesë në procesin e vendimmarrjes për sfidat më të rëndësishme globale, ajo e riafirmoi qëndrimin për nevojën për reforma të thella të OKB-së dhe përforcimin e rolit të Asamblesë së Përgjithshme.
Në këtë takim u shkëmbyen mendime mbi prioritetin më të rëndësishëm të politikës së jashtme maqedonase – anëtarësimin në Bashkimin Evropian, si dhe për proceset dhe marrëdhëniet aktuale evropiane dhe ndërkombëtare.
Ambasadori Bogananta shprehu mirënjohje për mbështetjen e institucioneve maqedonase gjatë mandatit të tij dhe e konfirmoi gatishmërinë e Indonezisë për zgjerimin dhe thellimin e marrëdhënieve të ndërsjella, me theks në ekonomi.
Duke e përgëzuar përvojën e tij të parë diplomatike, Presidentja shprehu gatishmërinë për të vazhduar bashkëpunimin me pasardhësin e tij.
