Presidentja Gordana Siljanovska Davkova sot e mirëpriti përfaqësuesin special të Republikës Federale të Gjermanisë për Ballkanin Perëndimor, Manuel Saracin.
Në këtë takim u bisedua mbi marrëdhëniet bilaterale ndërmjet dy vendeve, mbi procesin e eurointegrimeve maqedonase, si dhe mbi situatën aktuale në rajonin e Ballkanit Perëndimor nëpërmjet prizmit të perspektivës evropiane.
Presidentja Siljanovska Davkova e përshëndeti dialogun intensiv politik me Gjermaninë, si një nga aleatët dhe partnerët tanë më të afërt, dhe shprehu gatishmërinë e plotë për bashkëpunim të mëtejshëm të suksesshëm në të gjitha fushat e interesit të përbashkët.
Presidentja falënderoi për mbështetjen parimore dhe të zëshme të pushtetit gjerman për eurointegrimet maqedonase, për Rezolutën e Bundestagut gjerman dhe angazhimin e tyre të përgjithshëm në Procesin e Berlinit dhe shprehu pritjen e saj për mbështetje të mëtejshme, duke theksuar se zgjerimi i Bashkimit është në interes të stabilitetit politik, ekonomik dhe të sigurisë të të gjithë rajonit.
Ajo vuri në dukje ndërgjegjësimin për detyrimet që dalin nga marrëveshjet ndërkombëtare dhe theksoi se i kushtojmë shumë rëndësi ruajtjes së marrëdhënieve të mira fqinjësore, por në të njëjtën kohë theksoi pritjet e qytetarëve që procesi eurointegrues të vlerësohet me si duhet, në bazë të Kritereve të Kopenhagës.
