Sot në Kabinetin e Presidentit u mbajt Mbledhja konstitutive e Këshillit të Sigurimit.
Në këtë mbledhje të cilën e kryesonte Presidentja Gordana Siljanovska Davkova, morën pjesë anëtarët e Këshillit të Sigurimit sipas funksionit: Afrim Gashi, Kryetar i Kuvendit, Hristijan Mickoski. Kryeministri i Qeverisë, Pançe Toshkovski, ministër i Punëve të Brendshme, Vllado Misajllovski, ministër i Mbrojtjes dhe tre anëtarët e emëruar nga Presidentja: Xhevdet Hajredini, Malinka Ristevska Jordanova dhe Vllado Spiridonov.
Me ftesë të Presidentes Siljanovska Davkova, morën pjesë dhe referuan në punën e Këshillit të Sigurimit: shefi i Shtabit të Përgjithshëm të Armatës, gjeneralmajor Sashko Llafçiski, drejtoresha e Agjencisë së Zbulimit, Gabriela Jakovleva dhe drejtori i Agjencisë për Siguri Kombëtare, Bojan Hristovski.
Këshilli i Sigurimit në këtë mbledhje konkludoi se situata në vend është stabile dhe nuk ka indikacione për kërcënime ndaj kufijve, integritetit dhe sovranitetit të shtetit.
Të pranishmit deklaruan se institucionet kompetente monitorojnë rregullisht situatën në vend dhe mjedisin rrethues dhe se sistemi i sigurisë kombëtare është funksional dhe siguron paralajmërim me kohë mbi kërcënimet dhe rreziqet e mundshme.
Pjesëmarrja e Armatës në misionet e NATO-s, misionet e BE-së dhe misionet e OKB-së ka qenë e suksesshme dhe vazhdon, ndërsa numri i pjesëmarrësve në misione përcaktohet në varësi të nevojave dhe vendimeve të institucioneve kompetente.
Këshilli i Sigurimit do të mblidhet çdo tre muaj, kurse edhe më shpesh nëse nevojitet.
