Presidentja Gordana Siljanovska Davkova priti sot në takim pjesëmarrësit e përfshirë në programin “Oxford Connection”, Jay Jakub, Drejtor Ekzekutiv i Fondacionit të Ekonomisë së Ndërsjellë, Michael Ramsden, ligjërues, si dhe krijuesit e programit, Kostake Milkov, President i Institutit Ballkanik të Fesë dhe Kulturës, si dhe znj. Nada Milkova, Drejtoresha e Shtëpisë Botuese “Metanoja”.
Duke i falënderuar për vizitën e tyre, Presidentja Siljanovska Davkova theksoi se programi akademik dhe kulturor “Oxford Connection” jo vetëm që u ofron studentëve maqedonas qasje në projektet më të fundit kërkimore, por edhe mundësinë për t’u takuar personalisht me hulumtuesit. Për të, programi paraqet urë lidhëse midis institucioneve të arsimit të lartë maqedonas dhe Oksfordit, si një nga universitetet më të mira të rënditura në botë.
Mysafirët e informuan Presidenten Dr. Siljanovska Davkova në lidhje me hulumtimet lidhur me qëllimet themelore të biznesit, duke theksuar se qëllimi themelor i biznesit nuk është të krijojë fitim, por të gjejë zgjidhje fitimprurëse për problemet e njerëzve dhe të planetit, në vend që të përfitojë nga krijimi i problemeve për njerëzit dhe planetin. Në këtë kontekst, ata shpjeguan metrikën e re të fitimit për të gjithë aktorët në procesin e punës, pa pasoja negative për punonjësit dhe mbrojtjen e mjedisit.
Bashkëbiseduesit theksuan nevojën për përkushtim më të veçantë të të rinjve, si subjekte që mund të sjellin ndryshime pozitive shoqërore.
Programi “Oxford Connection” u iniciua nga Instituti Ballkanik i Fesë dhe Kulturës në vitin 2011. Brenda kuadrit të tij, më shumë se 100 profesorë, lektorë dhe kandidatë doktorature nga Oksfordi patën mundësinë të prezantojnë hulumtimet e tyre në fushën e: fizikës, kimisë, mjekësisë, inteligjencës artificiale, filozofisë, etikës, letërsisë, biznesit dhe historisë.
