Presidentja Gordana Siljanovska Davkova sot mirëpriti delegacion nga Oda Ekonomike e Maqedonisë Veriperëndimore, të udhëhequr nga kryetari i Odës, Mendi Qura.
Presidentja Siljanovska Davkova u informua mbi punën prej dy dekadash të Odës, problemet dhe sfidat me të cilat ballafaqohet bashkësia e biznesit, si dhe mundësitë për përmirësimin e ambientit afarist.
Sipas përfaqësuesve të Odës, nuk ka përparim ekonomik pa shtet ligjor dhe një betejë të pamëshirshme kundër korrupsionit dhe eliminimit të ekonomisë gri.
Ata theksuan se mungesa e fuqisë punëtore, në vend të importimit të punëtorëve nga jashtë, duhet të zgjidhet sistematikisht, nëpërmjet ndryshimeve në procesin arsimor që do të sigurojnë një fuqi punëtore të kualifikuar vendase.
Presidentja Siljanovska Davkova e theksoi nevojën për një proces legjislativ gjithëpërfshirës dhe transparent në të cilin do të përfshihen të gjitha palët e interesuara, midis të cilave edhe odat ekonomike.
Sipas saj, në vizita ndërshtetërore duhet të marrin pjesë edhe përfaqësues të sektorit të biznesit.
Përfaqësuesit e Odës e përshëndetën iniciativën e Presidentes për themelimin e Këshillit kombëtar për Bashkëpunim me Diasporën dhe shprehën gatishmërinë për të marrë pjesë në punën e tij.
