Presidentja Gordana Siljanovska Davkova, në margjinat e Konferencës për ndryshimet klimatike (KOP29) në Baku, Azerbajxhan, u takua me Presidentin bullgar Rumen Radev.
Në bisedën, e cila zgjati një orë dhe u zhvillua në një atmosferë konstruktive, u diskutua nevoja për përmirësimin e marrëdhënieve maqedonase-bullgare, për tejkalimin e çështjeve të hapura midis dy vendeve, si dhe mbi mundësitë për thellimin dhe dinamizimin e bashkëpunimit bilateral në shumë fusha me interes të ndërsjellë.
Dy bashkëbiseduesit i prezantuan qëndrimet e tyre për zgjidhjet e mundshme të sfidave të evrointegrimeve maqedonase.
Presidentja e nënvizoi rëndësinë e vazhdimit të dialogut politik bilateral në të gjitha nivelet dhe vuri në dukje se duhet të respektohen qëndrimet dhe interesat e të dyja palëve dhe se zgjidhja e konteksteve bilaterale duhet të jetë në suazat e vlerave dhe parimeve themelore të Bashkimit Evropian.
Ajo theksoi se marrëdhëniet duhet të zhvillohen në bazë të respektit të ndërsjellë, mbështetjes dhe bashkëpunimit aktiv, i cili do të kontribuojë në përforcimin e besimit dhe miqësisë midis dy popujve.
Presidenti bullgar Radev e theksoi nevojën për zgjidhjen e shpejtë të çështjeve të hapura, si dhe nevojën për vendosjen e marrëdhënieve të mira në të gjitha fushat me interes të përbashkët për mirëkuptim reciprok.
Në këtë bisedë, të dy bashkëbiseduesit ranë dakord për organizimin e vizitave zyrtare ku do të konkretizohen angazhimet për një bashkëpunim më të mirë të përgjithshëm ndërmjet dy shteteve.
