Претседателот и врховен командант на вооружените сили, Стево Пендаровски денеска во Домот на Армијата во Скопје присуствуваше на годишното реферирање за борбената готовност на Армијата на Република Северна Македонија во 2023 година.
Во присуство на министерката за одбрана, Славјанка Петровска и генерал-потполковник Васко Ѓурчиновски претставниците на Армијата информираа за реализацијата на плановите и задачите и состојбата во Армијата во текот на 2023 година.
Претседателот Пендаровски беше запознаен со состојбата и степенот на реализација на активностите во областите на персонален менаџмент, обука и вежби, операции во земјата и странство, опрема и инфраструктура, воено планирање и структура на сили, модернизација, буџетирање и финансирање.
Претседателот и врховен командант Стево Пендаровски истакна дека и во 2023 година припадниците на Армијата ја докажаа својата професионалност, посветеност и подготвеност. Тој истакна дека Армијата одговорно ги извршува обврските кои произлегуваат од членството во НАТО, соработката со телата и комитетите во рамки на НАТО и другите армии и го истакна своето очекување дека опремувањето и модернизацијата на Армијата ќе продолжи и во следните години.
Претседателот Пендаровски ги реафирмираше своите заложби за натамошно подигнување и одржување на квалитетен стандард и услови за работа и служба на сите припадници на Армијата и за достигнување на зацртаната цел – два отсто од БДП да се одвојува за одбраната.
Реферирањето е редовна годишна обврска на началникот на Генералштабот пред врховниот командант.
