Претседателот Стево Пендаровски во рамки на проектот „Лице в лице со претседателот“, денеска ја прими Лејла Куртов, авторка на изложбата „Руралната жена низ објективот“, којашто ќе биде поставена на 22 март во „Оро-радио галерија и бар“, во Скопје.
Презентирајќи ги своите дела инспирирани од секојдневието на руралната жена, Лејла ја нагласи нејзината заложба за надминување на предрасудите и стереотипите, вреднувајќи ја улогата на руралната жена во негувањето на нашата култура и традиција. Фотографиите биле направени во период од 10 месеци, на различни локации во Општина Конче. Откако решила главниот град да го замени со живот на село, Лејла од Скопје се преселила во Конче. Сега работи како воспитувачка во тамошната детска градинка.
На средбата со претседателот Пендаровски, Лејла ја придружуваа уште неколку жени, жителки на општината Конче коишто главно се занимаваат со земјоделство. И тие ги споделија своите животни приказни и истакнаа дека државата го занемарува придонесот на жените од руралните средини во целокупниот развој на општеството.
Поздравувајќи го придонесот на Куртов и на останатите жени во афирмацијата на руралната жена, претседателот Пендаровски ја потенцираше потребата од континуиран ангажман и партнерска соработка на државните институции и граѓанските организации во насока на суштинска поддршка и подобрување на социјалната положба на оваа категорија наши сограѓанки.