Претседателот Стево Пендаровски денеска во Млади Хаб, се сретна со тимот „Лаигорианс“ (Laigorians), победници на годинашното македонско суперфинале од хакатонот „НАСА спејс апс челинџ 2023“, во организација на Американската агенција за вселенски истражувања НАСА.
На средбата претседателот Пендаровски беше информиран за проектот, со кој учесниците го освоија првото место, што со помош на вештачка интелигенција, користејќи реални податоци од сателити на Националната аеронаутичко-вселенска управа (НАСА), овозможува мониторинг, менаџирање и навремена реакција при појавата на шумски пожари.
Споделувајќи ги импресиите и стекнатите искуства од учеството на годинашниот меѓународен предизвик за вселенски апликации, победничкиот тим, се осврна на мотивот за избор на областа во која беше развиена апликацијата, што треба да помогне во заштитата на животната средина.
Годинашниот хакатон, што се одржуваше 72 часа, беше можност кодери, научници, дизајнери, креатори и технолози од целиот светот, да се здружат и да користат отворени податоци, од НАСА и нејзините партнери, создавајќи решенија за главните предизвици на глобално ниво.
Упатувајќи честитки за постигнатите исклучителни резултати, претседателот Пендаровски им посака успех во нивниот следен предизвик – меѓународниот натпревар во САД, на кој ќе учествуваат тимови од целиот свет.
