Ученици од ООУ „Љубен Лапе“ од Скопје денеска го посетија Кабинетот на Претседателот на Република Северна Македонија, во рамки на активноста Отворен Кабинет.
Посетителите имаа можност да се сретнат и да поразговараат со претседателот Пендаровски, да присуствуваат во просториите неменети за официјални и работни средби, како и во салите во коишто се реализираат состаноци, прес-конференции, седници на Советот за безбедност, предавање на акредитивни писма од странски амбасадори, како и свечености.
Во мозаик салата учениците го разгледаа и се запознаа со симболиката на импозантниот диптих „Македонија – светла земја“ и „Македонија памети“, дело на еден од најзначајните современи македонски уметници, академик Глигор Чемерски. Од вработените во Кабинетот беа информирани за историјатот на објектот во којшто е сместен Кабинетот на Претседателот, како и за начинот на функционирање на оваа институција.
Отворен Кабинет е дел од проектот Лице в лице со Претседателот, во чиишто рамки се реализираат директни средби на граѓаните со претседателот Стево Пендаровски. Досега Кабинетот го посетиле граѓани од различни возрасти и професионални области, студенти од земјава и од странство, како и ученици од основни и средни училишта од земјава.
