Кабинетот на претседателот Стево Пендаровски, денеска, во рамки на Отворен Кабинет го посетија ученици од ООУ „Петар Поп Арсов“ и од ООУ „Александар Македонски“ од Скопје.
За време на престојот во Кабинетот, учениците се сретнаа и поразговараа со претседателот Пендаровски за неговите секојдневни обврски и за претседателските надлежности, а ги споделија нивните интереси и желби за идната професионална определба.
Гостите се запознаа и со дел од вработените во Кабинетот и беа информирани за историјатот на Вила Водно, за дел од активностите коишто се одвиваат, како и за начинот на функционирање на оваа институција. Тие ги посетија и просториите во коишто се реализираат официјалните и работните средби, свечености, настани и прес-конференции.
Проектот „Отворен Кабинет“, во континуитет овозможува сите заинтересирани граѓани и институции да остварат посета на Кабинетот и да се сретнат со претседателот Пендаровски. Институцијата досега ја посетиле илјадници граѓани од различни возрасти и занимања, организации од земјава и од странство, студенти и ученици од основни и средни училишта.