Во рамки на активноста Отворен кабинет, денеска Кабинетот на претседателот го посетија деца од Детската градинка „8 Април“ од Шуто Оризари и ученици од основните училишта „Димитар Македонски“ од Аеродром, „Киро Глигоров“ од Центар и „Кузман Јосифовски-Питу“ од Кисела Вода.
За време на престојот посетителите имаа можност да се сретнат и поразговараат со претседателот Пендаровски, а ги посетија и просториите во коишто се одвиваат официјалните и работните средби, како и салите во коишто се реализираат состаноци, свечености, настани и прес-конференции. Во Мозаик салата ги разгледаа мозаиците „Македонија – светла земја“ и „Македонија земјата памети“ изработени од академик Глигор Чемерски.
Вработените во Кабинетот ги запознаа со историјатот на објектот во којшто е сместен Кабинетот и со начинот на функционирање на институцијата.
Отворен Кабинет во континуитет овозможува граѓани од различни возрасти, професии и занимања, студенти од земјава и од странство, ученици од основни и средни училишта, како и деца кои посетуваат предучилишни установи да остварат посета на Кабинетот и да се сретнат со претседателот Пендаровски.
