Претседателката Гордана Сиљановска Давкова денеска на проштална средба го прими амбасадорот на Кралството Белгија, со седиште во Софија, Фредерик Мерис.
На средбата беа разменети мислења за севкупните билатерални односи меѓу двете држави, при што беше оценето дека се одликуваат со пријателство и заемна подготвеност за нивно унапредување во сите сфери од заемен интерес. Во насока на натамошно динамизирање на комуникацијата и меѓусебните односи, претседателката Сиљановска Давкова го реафирмираше интересот од македонската страна за резидентно претставување и отворање на белгиска амбасада во Скопје.
На средбата се разговараше за перспективите на државата за напредок во евроинтеграциските процеси, реформската агенда по формирањето на новата влада, како и исходот од белгиското претседателство со Советот на Европската Унија, кое завршува на крајот од месецот. Во тој контекст, претседателката Сиљановска Давкова се заблагодари за севкупната белгиска поддршка по однос на македонските аспирации за членство во Европската Унија и препознавањето на проширувањето како стратешки интерес на унијата.
Претседателката Сиљановска Давкова се заблагодари за севкупниот дипломатски ангажман и придонесот на амбасадорот Мерис во развојот на македонско-белгиските односи и му посака натамошен успех на личен и на професионален план.
