Претседателката Гордана Сиљановска-Давкова денеска го прими во проштална средба амбасадорот на Јапонија, Казуја Оцука.
Уште еднаш потврдија дека односите меѓу двете земји и покрај географската оддалеченост се блиски и пријателски и изразија решеност и подготвеност за идна соработка во различни области, од економската до културната.
Претседателката ја потенцираше важноста на континуираната јапонска подршка и помош за нашиот севкупен развој и ги поздрави новите форми на културна соработка.
Таа посебно ја акцентираше оригиналноста на одбележувањето на триесетгодишнината од македонско-јапонската соработка преку организирање триесет различни настани ширум Македонија.
Ја истакна важноста на универзитетската соработка за развојот на нашето образование и наука и посебно се заблагодари за изучувањето на македонскиот јазик во средното училиште „Таканава“ во Токио, како отворено признание на македонскиот национален и културен идентитет.
Во пресрет на одржувањето на „ЕКСПО ОСАКА 2025“, јапонскиот амбасадор го поздрави учеството на македонските уметници, кои ќе се претстават со изложбена поставка на проектот на познатиот јапонски архитект Кензо Танге, кој одигра важна улога во обновата и изградбата на Скопје, по катастрофалниот земјотрес од 1963 година, оставајќи траен печат на современата македонска архитектура.
Претседателката му изрази признание и особена почит на амбасадорот Оцука за персонифицирањето и практикувањето на традиционалната и културната дипломатија низ неговите бројни активности и настани.
Заблагодарувајќи му се за исклучителниот дипломатски ангажман во продлабочувањето и зацврстувањето на македонско-јапонските односи, претседателката му посака успех и среќа во соочувањето со идните обврски и предизвици.
