Претседателот Стево Пендаровски во рамки на проектот „Лице в лице со претседателот“, ја посети планинарката Мира Симоновски од Делчево.
Во разговор со претседателот Пендаровски, 74- годишната Симоновски ги сподели впечатоците од нејзиното последно достигнување, искачувањето на врвот Ухуру на планинскиот масив Килиманџаро во Африка, којшто се наоѓа на 5895 метри надморска височина, како дел од експедицијата на Клубот за планински спортови АЗОТ.
Во оваа насока, таа додаде дека ова е втор врв којшто го искачила по навлегувањето во осмата деценија од својот живот. Имено, во септември 2020- тата година, со наполнети 70 години ја достигнала висината од 5137 метри на врвот Арарат, во Источна Анадолија. Со тоа станала и првата жена планинар од Делчево. Освен овие поголеми експедиции, во достигнувањата на Мира Симоновска се вбројуваат и неколкукратни искачувањата на врвот Триглав.
Честитајќи ѝ за храброста, ентузијазмот и одличната физичка подготвеност, претседателот Пендаровски изрази надеж дека успесите на Мира Симоновски ќе бидат инспирација и мотивација за многу други планинари.
