Претседателката Гордана Сиљановска Давкова денеска ја прими Ребека Јанковска, претставничка на Здружението „Јас Сум Жена“.
На средбата, претседателката Сиљановска Давкова беше информирана за досегашната работа и активности на здружението коишто се насочени кон вмрежување на успешни жени, едуцирање и истражување во сите сфери на општеството во земјава и пошироко. Во тој контекст, беа истакнати настаните и програмите кои вклучуваат работилници и предавања на домашни и странски експерти на сите теми од интерес на жените преку кои ќе се придонесе да се стекнат вештини и квалитети за нивно поголемо вклучување во општествените текови и создавање на повеќе можности за идните генерации.
На средбата се разговараше и за претстојното трето издание на Глобалната женска лидерска конференција „Јас Сум Жена“ коешто претставува едно од најзначајните активности на ова здружение.
Претседателката Сиљановска ги поздрави посветеноста и заложбите на Здружението „Јас Сум Жена“ и ја изрази својата поддршка посакувајќи им успеси во предвидените активности.
