Претседателот Стево Пендаровски преку видео порака се обрати на отворањето на јубилејните 50. „Октомвриски средби“ што се одржуваат во Охрид, во организација на Сојузот на здруженија на медицински лаборанти и санитарни техничари.
Почитувани членови на Сојузот на здруженија на медицински лаборанти и санитарни техничари,
Почитувани гости,
Дами и господа,
Жал ми е што поради претходно преземени обврски денес не сум во можност да бидам лично со вас, но, ви благодарам на можноста да ви се обратам и да ве поздравам преку видео порака.
Имајќи во предвид дека „Октомвриските средби“ изобилуваат со пленарни предавања, презентации и сесии од еминентни професори, лекари и лабораториски специјалисти и техничари, каде што ќе бидат презентирани современите достигнувања во сите области на лабораториската дијагностика, убеден сум во уште едно успешно издание.
Впрочем, фактот што средбите се одвиваат во континуитет веќе пет децении е најдобра потврда за нивната релевантност. Би сакал да ја искористам оваа прилика и на Сојузот на здруженија на медицински лаборанти и санитарни техничари најискрено да им го честитам големиот јубилеј, 50 години „Октомвриски средби“ и секако да посакам уште многу години траење на оваа манифестација.
Токму преку „Октомвриските средби“ како врвен меѓународен стручен собир вие споделувате искуства меѓу себе и ја развивате соработката помеѓу колегите како во земјава, така и од регионот. На тој начин, давате придонес за унапредување на лабораториската пракса на повисоки нивоа.
Се разбира, сојузот кој обединува 1500 членови, поради самиот тој факт, заслужува почит и поддршка и за останатите свои програмски активности. Во оваа прилика мораме да ги споменеме и „Априлските средби“ кои се одржуваат во чест на светскиот ден на лабораторијата. Со севкупниот ангажман и бројните настани Сојузот суштински придонесува за понатамошно унапредување и стекнување на нови знаења на своите членови што е од витален интерес за македонското здравство и воопшто за целото наше општество.
Драги пријатели.
Како што и претходно констатирав, несомнено е големо значење на медицинските лаборанти и санитарни техничари во рамките на целокупниот здравствен систем. Благодарение на вашата професионалност, етика и посветеност имаме ефикасно спроведување на лабораториските тестови кои се неопходен сегмент во медицинскиот третман на пациентите. Вашиот, но, и воопшто придонесот на секој медицински работник во квалитетната и навремена грижа за пациентите е од суштинско значење и како таков мора да биде почитуван и вреднуван.
За време на Ковид пандемијата, лабораториските анализи беа од критична важност и вие, како и секогаш, бевте максимално ангажирани придонесувајќи во борбата со вирусот и за грижата и негата на пациентите. Впрочем, вие најдобро знаете дека борбата за животите и здравјето на нашите граѓани е секојдневие во кое нема пауза и не се дозволени импровизации. И во пандемија, и во помирни времиња, вие и сите здравствени работници сте максимално ангажирани и мобилизирани да помогнете и затоа ја имате благодарноста и поддршката на целата заедница.
Би сакал на крајот од ова мое обраќање уште еднаш да ви посакам успешни 50-ти „Октомвриски средби“, а на сите гости од странство пријатен престој во Република Северна Македонија.
Ви благодарам.