Претседателот Стево Пендаровски денеска се обрати на десеттиот To be secure (2BS) форум, во организација на Атлантскиот совет на Црна Гора.
Говорејќи на тема „Западниот Балкан за 10 години“, претседателот Пендаровски истакна дека за една декада земјите од Западен Балкан може да го достигнат денешното ниво на развој на централно-европските земји единствено со поголема посветеност на ЕУ и САД на регионот, преку реално, а не техничко оценување на процесите на демократизација и доколку про-европски сили се на власт.
Според претседателот Пендаровски, најдобрите резултати за демократизација и напредок на земјите од регионот се постигнати со поддршката и лидерството на евроатлантската заедница како целина.
Предизвици за регионот, рече претседателот Пендаровски, и натаму остануваат владеењето на правото, човековите права, слободата на медиумите и независноста на медиумите.
Според претседателот Пендаровски, позитивното сценарио за регионот опфаќа почеток на пристапните преговори за членство на Република Северна Македонија и Република Албанија во Европската Унија, забрзување на почнатите пристапни преговори на Црна Гора и на Република Србија, напредок во разговорите Белград-Приштина, како и преку зголемување на меѓународните напори во Босна и Херцеговина.
Уверен сум, рече претседателот Пендаровски, дека иднината на Балканот ќе биде светла единствено со отфрлање на национализмот, што предизвика страдање и уништување во минатото.
На сесијата во рамки на форумот, покрај претседателот Пендаровски, се обрати и претседателот на Република Словенија, Борут Пахор.
