Претседателот Стево Пендаровски преку видео – порака се обрати на свеченоста, што по повод 21 Декември – Денот на наставата на турски јазик, ја организираше здружението „Уфук“.
Почитувани претставници на здружението „Уфук“,
Ви благодарам за поканата да се обратам на овој свечен настан. За жал, поради претходно превземени обврски, не можам да бидам меѓу вас на оваа важна свеченост. Но, дозволете со оваа порака да ве поздравам, да ви го честитам 21 Декември – Денот на наставата на турски јазик и да споделам со вас неколку мои согледувања на оваа тема.
Можноста за образование на мајчин јазик е суштинска демократска вредност што придонесува за развој на културниот плурализам во едно општество. Правото да се говори и твори на сопствениот јазик е едно од најзначајните човекови права, преку кои се чува и промовира и личниот и идентитетот на целата етничка заедница.
Во Република Северна Македонија се негува долга традиција на соживот. Со право можеме да се гордееме со достигнувањата на сите етнички заедници кои се дел од нашето мултиетничко и мултијазично општество.
Како лојални македонски граѓани, припадниците на турската заедница придонесуваат за развојот и напредокот на нашата заедничка татковина. За тоа зборуваат и признанијата што вечерва се доделуваат за особен придонес на турската заедница. Освен што се вреден дел на домашниот мултиетнички мозаик, Турците се и мост на поврзување со пријателска Република Турција.
Почитувани,
И во најтешките периоди за македонската демократија, здружението „Уфук“ не отстапи од хоризонтот на прогресивните вредности. Залагајќи се за европската и евроатлантската интеграција на нашата држава, „Уфук“ беше и останува да биде глас на младите Турци кај нас.
Изразувајќи благодарност за вашите досегашни заложби, ве повикувам и во иднина, заедно, да продолжиме во градењето подобра и попросперитетна иднина за сите нас.
Ви благодарам.
