Сопругата на претседателот, г-а Елизабета Ѓоргиевска се обрати на Форумот 2023: Занаетчиството како важен дел на економијата и неговата визија за создавање на квалификувана работна сила во Република Северна Македонија.
Настанот е во организација на Занаетчиската комора на Република Северна Македонија со поддршка на Министерството за економија во рамки на проект за промоција на занаетчиството и зајакнување на соработката со партнерите.
На конференцијата учествуваа претставници од неколку министерства, од локалната самоуправа, коморите, центрите за стручно образование и обука на меѓународно и национално ниво коишто се вклучени во процесот на креирање на политиките за пазарно-ориентирано стручно образование и обука.
Во рамки на Форумот 2023 учесниците дискутираа на темите: „Иднината на занаетчиството – Важноста на политиките при обезбедувањена поддршка на занаетчиите“ и „Креирање на поконкурентно деловно опкружување за занаетчиството“ поделени во две панел дискусии.
Целта на Форумот е да ги олесни дебатите за јавните политики на теми релевантни за Република Северна Македонија преку годишни конференции и семинари.
Во продолжение е интегралниот текст од обраќањето на сопругата на претседателот, г-а Елизабета Ѓоргиевска.
Дами и господа, добар ден.
Благодарам за укажаната чест од организаторите да го отворам овој Форум, топло поздравувајќи ве сите вас, почитувани учесници, почитувани гости и соработници на овој значаен настан. Верувам дека тој ќе рефлектира на влијанието на занаетчиството врз економијата и визијата за негување на квалификувана работна сила во Северна Македонија.
Оваа визија ги надминува економските размислувања – таа е истовремено и наратив на вештина, традиција и создавање на одржлива иднина, затоа што занаетчиството не е само индустрија, тоа е културен камен-темелник, историска нарација вткаена во ткивото на нашиот идентитет.
Целта е повеќе од јасна: да ја зголемиме конкурентноста на нашите занаетчии и да ги усогласиме економските норми со стандардите поставени од Европската Унија. Мојата поддршка при оставарувањето на оваа мисија, е тесно поврзана со моите заложби да го признаеме и славиме непроценливиот придонес на жените занаетчики во одржувањето на традиционалните занаети.
Жените, како занаетчики, претприемачки и носители на традицијата, играат интегрална улога во обликувањето на нашето културно наследство. Вештите раце на жените занаетчики ги плетат нишките на традицијата, осигурувајќи дека таписеријата на нашето културно богатство и понaтаму останува жива и разновидна. Нивните вештини и претприемачки дух значително придонесуваат за растот на економијата.
Со зајакнувањето на занаетчискиот сектор, ние не само што ја подобруваме економската состојба, туку и создаваме услови за поголема вклученост во креирањето на политики на локално и национално ниво.
На самиот крај, ја користам можноста да го честитам потпишувањето на Декларацијата за пристап во Асоцијацијата на Занаетчиски комори на Западен Балкан, за време на овој Форум. Со тоа се создава уште еден модалитет за одржување на виталноста на занаетчиството, зајакнување на квалификувантаа работна сила и славење на уникатните придонеси на занаетчиите.
Верувам дека преку денешните плодни дискусии, ќе споделиме сознанија и заеднички ќе придонесеме за визијата за попросперитетна економија, предводена токму од квалификуваната работна сила. Посакувам овој собир да прерасне во главна платформа за иновации и создавање партнерства кои ќе ја обликуваат траекторијата на занаетчиството во земјава и пошироко.
Благодарам.
