Кабинетот на претседателот, во рамки на Отворен кабинет, денеска го посетија ученици од ООУ „Мирче Ацев“ и лица од Заводот за рехабилитација на деца и младинци од Скопје.
За време на посетата во Кабинетот, тие присуствуваа во просториите во коишто се реализираат официјалните и работните средби, во салите во коишто се одржуваат состаноци, свечености, настани и прес-конференции. Во Мозаик салата го разгледаа и се запознаа со содржината на импозантниот диптих „Македонија – светла земја“ и „Македонија земјата памети“ – дело на современиот уметник, академик Глигор Чемерски.
Денешните гости имаа можност и да се сретнат и да поразговараат со претседателот Пендаровски и да ги споделат нивните желби, хобија, интереси и омилени активности.
Активноста Отворен Кабинет во континуитет овозможува директни средби на граѓаните со претседателот Стево Пендаровски. Институцијата досега ја посетиле илјадници граѓани од различни возрасти и занимања, студенти од земјава и од странство, како и ученици од основни и средни училишта од земјава.