Сопругата на претседателот, Елизабета Ѓоргиевска денеска беше во посета на ЈЗУ Универзитетската клиника за детски болести и ЈЗУ Институт за белодробни заболувања кај децата – Козле во Скопје, а во Канцеларијата на претседателот, Млади Хаб имаше неформална средба со деца и млади, претставници на Здружението на лица со Даунов синдром „Трисомија 21“ и Танцовото студио “Еурека“.
Во Одделот за гастроентерологија при ЈЗУ Универзитетската клиника за детски болести, Скопје, сопругата на претседателот придружувана од директорката д-р Валентина Цвејоска Чолаковска, посети неколку соби на хоспитализирани деца на кои им додели подароци и играчки, а со вработените имаше можност да поразговара за нивната работа насочена кон лечење на најмладите пациенти. Во ЈЗУ Институт за белодробни заболувања кај децата – Козле во Скопје заедно со економскиот директор м-р Тахир Таири, посети неколку соби на хоспитализирани деца. На најмладите пациенти им додели подароци и играчки и им посака побрзо да оздрават и да се вратат во своите семејства.
Во Канцеларијата на претседателот Млади Хаб, сопругата на претседателот се дружеше со деца и млади, претставници на Здружението на лица со Даунов синдром „Трисомија 21“ и Танцовото студио “Еурека“ . На децата и младите им додели подароци и играчки, а низ забава и заедничка дружба, г-а Ѓоргиевска им посака многу безгрижно детство, многу здравје и среќа во Новата Година. 
На денешните настани на кои присуствуваше сопругата на претседателот, таа беше придружувана од претставници на фабриката “Макпрогрес“ и нивниот бренд Винчини кои на децата им подарија играчки коишто се дел од хуманитарната донација од децата за децата.
