Сопругата на претседателот Елизабета Ѓоргиевска денеска беше во посета на Битола при што ја посети Приватната установата за социјална заштита на стари лица Дом Софија и оствари средби со претставници на Центарот за психосоцијална поддршка и истражувања „Одраз“ и со младата историчарка Ивана Хаџиевска.
Во Установата за социјална заштита на стари лица Дом Софија, сопругата на претседателот имаше можност да ги посети и да поразговара со лицата кои овде престојуваат, а се запозна и со условите и нејзиното функционирање, како и со разновидните активности што се преземаат во насока на следење на состојбата и здравствените потреби на оваа категорија на граѓани.
На средбата со група за поддршка на жени со разни типови канцер од Центарот за психосоцијална поддршка и истражувања „Одраз“, г-а Ѓоргиевска се запозна со нивните активности коишто имаат за цел пружање на секаков вид на психоцијална поддршка во секојдневната битка на жените заболени од канцер. На средбата беа присутни и претставнички на Здружението на дијабетичари на општина Битола со кои разговараше за нивните тековни предизвици и нивните потреби.
Во рамки на средбата со младата и меѓународно призната историчарка и истражувачка Ивана Хаџиевска којашто ја проучува женската современа историја на 20 век и денес, се разговараше за нејзините последни истражувања „Македонка“ и „Архиви на невидливите“, кои се резултат на заеднички истражувачки процес со тим на антрополози и културолози. На средбата се разви дискусија за историските, културолошките и антрополошките сознанија за позицијата жената денес, и за важноста на институционалната поддршка на ваквите истражувања кои можат да помогнат во понатамошната заложба за родовата еднаквост.