Сопругата на претседателот Елизабета Ѓоргиевска денеска присуствуваше на завршниот настан на проектот „Силни женски организации, силно општество“, којшто беше спроведуван од Организацијата на жените на општина Велес со финансиска поддршка од механизмот за граѓанска отпорност на ЕУ.
На панел дискусијата насловена „Што се случува со феминизмот надвор од Скопје“, претставничките на граѓански организации од Куманово, како и претставнички на локални женски организации од Пелагонискиот, Вардарскиот и од Источниот регион говореа за својата долгогодишна дејност во насока на подобрување на многу области значајни за унапредување на правата и квалитетот на животот на жените во регионите каде дејствуваат. Притоа, истакнаа дека во последниот период се соочуваат со низа предизвици во однос на нивното функционирање и сметаат дека им е потребен нов почеток кој ќе овозможи преку нивното искуство и поддршка да продолжат понатаму со активностите особено со оние насочени кон помладите.
Во рамки на денешниот настан беа презентирани и стратешките цели на новата женска национална мрежа „Жените за жените“ којашто претставува здружување на женските организации во формална мрежа која целосно се фокусира на организацискиот развој и јакнење на капацитетите на женските организации надвор од Скопје. Преку работа со организации и движења за правата на жените, целта на националната мрежа „Жените за жените“ е да го промени и подобри животот на сите жени и девојки во нашето општество.
