Сопругата на претседателот, Елизабета Ѓоргиевска учествуваше на настанот „Едуцирај, ангажирај се, еманципирај: Панел-дискусија за превенција од адолесцентна бременост“ што се одржа во Eвропска куќа, Скопје.
Говорејќи за адолeсцентната бременост и аспектите за нејзина превенција, сопругата на претседателот истакна дека станува збор за испреплетување на многу моменти кои водат до малолетничка бременост. Според неа, постојат неколку аспекти кои треба да се земат предвид во превенирањето, пред сè, значајна е едукацијата која треба да се спроведе уште од мали нозе кај девојчињата и момчињата, а еден од поважните аспекти е и влијанието на семејството, односно влијанието на родителите. Во таа насока, г-а Ѓоргиевска истакна дека неопходна е комуникација на родителите со децата кога станува збор за овие сензитивни теми.
Сопругата на претседателот го нагласи и психолошкиот момент, како и свесноста на адолесцентите за телесната автономија и почитувањето на нивните права.
На панел дискусијата со свои видувања се обратија амбасадорот на ЕУ, Дејвид Гир; д-р Горан Димитров, раководител на Одделот за гинекологија и акушерство на Медицинскиот факултет во Скопје и претседател на Македонското лекарско друштво; Елизабета Божиноска, програмска директорка на ХЕРА; Јованка Брајовиќ Григоријевиќ, претставничка на УНФПА; Азиза Сали, од Иницијативата за правата на жените на Шуто Оризари и д-р Ивана Наков, гинеколог од примарна здравствена заштита, Поликлиника Манолеви.
На панел дискусијата присуствуваа претставници од Клубот на млади лекари, Асоцијација на специјализанти и млади лекари, Здружението на студенти по медицина, ХЕРА Млади.
Панел дискусијата е продолжеток на успешната серија дебати на теми од здравството, реализирани со поддршка на сопругата на претседателот и амбасадорот на ЕУ Дејвид Гир, а во соработка со Клубот на млади лекари.
