Presidentja Gordana Siljanovska Davkova sot i pranoi letrat kredenciale të Pernile Deiler Kardel, ambasadores së sapoemëruar të Mbretërisë së Danimarkës me seli në Beograd.
Në ceremoninë e dorëzimit të letrave kredenciale, Presidentja Siljanovska Davkova theksoi se që nga viti 1993, të dyja vendet në vazhdimësi ndërtojnë marrëdhënie miqësore dhe partneriteti që reflektohen nëpërmjet një niveli të lartë të dialogut politik dhe bashkëpunimit të ndërsjellë, duke theksuar se ka potencial të pashfrytëzuar dhe hapësirë për zhvillim të mëtejshëm, veçanërisht në marrëdhëniet ekonomike dhe tregtare.
Në fjalën e saj, Presidentja kujtoi përfshirjen e Danimarkës në momente kritike të historisë së Maqedonisë, duke filluar me shpalljen e pavarësisë dhe kontributin e ish-ministrit të jashtëm danez, Ufe Eleman Jensen, deri në ratifikimin e protokollit të anëtarësimit të shtetit tonë në NATO, kur Danimarka ishte ndër vendet e para anëtare që e bëri këtë.
“Më lejoni të shpreh mirënjohjen time të jashtëzakonshme për mbështetjen e rëndësishme nga Mbretëria e Danimarkës për integrimet tona evropiane. Pres vazhdimin e tij me ritme të pashtershme gjatë presidencës suaj me Këshillin e Bashkimit Evropian në gjysmën e dytë të vitit 2025”, tha Presidentja Siljanovska Davkova.
Ambasadorja Pernile Deiler Kardel tha se është nder i madh për të që dorëzon letrat kredenciale me të cilat është akredituar si ambasadore e Mbretërisë së Danimarkës dhe theksoi se do ta ndjekë me shumë interes rrugën tonë drejt anëtarësimit në Bashkimin Evropian.
Presidentja Siljanovska Davkova i uroi ambasadores së sapoemëruar daneze zbatim të suksesshëm të kësaj pozite të çmuar dhe të përgjegjshme dhe shumë suksese e shëndet në kryerjen e misionit të ambasadores.
