Presidentja Gordana Siljanovska Davkova sot i mirëpriti ambasadoren e Ukrainës Larisa Dir, ambasadoren e Konfederatës Zvicerane, Veronik Ulman dhe shefin e Delegacionit të Bashkimit Evropian, ambasadorin Dejvid Gir.
Në këtë takim, Presidentja Siljanovska Davkova shprehu mirënjohje për ftesën e dërguar nga Presidentja e Konfederatës Zvicerane, Viola Amherd, për pjesëmarrjen e saj në Samitin e Paqes në Ukrainë, që do të mbahet më 15 dhe 16 qershor në Zvicër.
Presidentja Siljanovska Davkova vlerësoi se samiti i ardhshëm është mundësi e mirë për të siguruar platformë për dialog për paqe gjithëpërfshirëse, të drejtë dhe të qëndrueshme në Ukrainë.
Presidentja Siljanovska Davkova riafirmoi mbështetjen maqedonase për Ukrainën pas agresionit ushtarak të paprovokuar dhe të pajustifikuar të Federatës Ruse dhe bëri thirrje për respektimin e integritetit territorial, sovranitetit dhe pavarësisë në Ukrainë brenda kufijve dhe ujërave territoriale të njohura ndërkombëtarisht.
