Në suazat e vizitës zyrtare në Republikën e Azerbajxhanit, Presidentja Gordana Siljanovska Davkova, sot në Baku, u takua me Kryetaren e Kuvendit Nacional, Sabiha Gafarova dhe me Kryeministrin, Ali Asadov.
Në takimin me Kryetaren e Kuvendit Nacional u shkëmbyen mendime mbi marrëdhëniet e përgjithshme bilaterale midis dy vendeve, duke përfshirë edhe bashkëpunimin në nivel parlamentar.
Presidentja Siljanovska Davkova, duke e theksuar angazhimin e saj të mëparshëm si deputete e Kuvendit, e theksoi rëndësinë e përforcimit të mëtejshëm të bashkëpunimit ndërparlamentar, i cili zhvillohet nëpërmjet Grupit parlamentar të Kuvendit për bashkëpunim me Kuvendin Nacional të Azerbajxhanit.
Bashkëbisedueset shkëmbyen mendime dhe informacione mbi punën e dy parlamenteve, si dhe përfaqësimin e grave deputete në to.
Presidentja theksoi se vizita zyrtare në Azerbajxhan, e cila zhvillohet në 30 vjetorin e vendosjes së marrëdhënieve diplomatike midis dy shteteve, do të kontribuojë në përparimin e bashkëpunimit. Ajo e theksoi potencialin për rritjen e bashkëpunimit ekonomik, shkëmbimin tregtar, realizimin e projekteve infrastrukturore, si dhe përkushtimin e palës maqedonase për diversifikimin e burimeve energjetike.
Gjithashtu, i vuri në dukje edhe mundësitë për investime që i ofron shteti, me vendndodhjen gjeografike, fuqinë punëtore të kualifikuar dhe rrjetin e gjerë të marrëveshjeve të tregtisë së lirë.
Ajo shprehu gjithashtu pritshmëri për zbatimin e iniciativave specifike në shumë fusha, siç janë: mbrojtja sociale, arsimi dhe shkenca, mjedisi, turizmi, qarkullimi.
Kryetarja e Kuvendit Nacional, Gafarova, duke vlerësuar përpjekjet e Presidentes Siljanovska Davkova për diplomacinë kulturore, theksoi se realizimi i vizitës zyrtare dhe mundësia për zgjerimin e kontakteve do të kontribuojë në intensifikimin e bashkëpunimit të përgjithshëm ndërmjet dy shteteve. Ajo shprehu pritjen për vizitë të afërme të Kryetarit të Kuvendit maqedonas në Azerbajxhan.
Në takimin me kryeministrin Asadov u shpreh kënaqësia për realizimin e vizitës zyrtare.
Presidentja vlerësoi se marrëdhëniet me Azerbajxhanin janë në nivel të shkëlqyer, të lira nga çdo çështje e pazgjidhur politike dhe shprehu besimin se ato do të përforcohen edhe më shumë me realizimin e vizitës zyrtare.
Në këtë drejtim, kryeministri Asadov, duke e vlerësuar vizitën si të suksesshme, theksoi se programi dhe takimet e zhvilluara gjatë vizitës janë shenjë e mirë për zhvillimin e mëtejshëm të marrëdhënieve bilaterale ndërmjet dy shteteve dhe shprehu gatishmërinë për përparimin e tyre.
Në të dyja takimet, Presidentja Siljanovska Davkova u informua mbi gjendjen në rajonin e Kaukazit dhe qëndrimet e Azerbajxhanit për këto çështje. U diskutua edhe mbi situatën në kontekstin e luftës në Ukrainë.
Me takimet me Kryetaren e Kuvendit Nacional, Gafarova dhe Kryeministrin Asadov, përfundon pjesa zyrtare e vizitës së Presidentes Siljanovska Davkova në Azerbajxhan.
Nesër, në Baku, Presidentja do të marrë pjesë në Forumin e 12 global në Baku, me titull “Rishqyrtimi i rendit botëror: Shndërrimi i sfidave në mundësi”, që organizohet nga Qendra ndërkombëtare “Nizami Ganxhavi” dhe do të mbahet nga 13 marsi deri më 15 mars.
