Presidentja Gordana Siljanovska Davkova, në suazat e pjesëmarrjes në Samitin për ndryshimet klimatike (KOP29) në Baku, u takua me kryeministrin e Mbretërisë së Belgjikës, Aleksandër De Kro.
Në këtë takim u shkëmbyen mendime për marrëdhëniet e përgjithshme bilaterale ndërmjet dy vendeve, kurse në fokus të bisedimeve ishin aspiratat maqedonase për anëtarësim në Bashkimin Evropian.
Kryeministri belg De Kro theksoi se shteti ynë mund të konsiderojë mbështetjen e fortë belge, sepse sipas Brukselit zyrtar, vendi ka bërë përparime të mëdha dhe tani është radha e Bashkimit Evropian të bëjë diçka.
Presidentja Siljanovska Davkova, duke i theksuar marrëdhëniet e mira dhe miqësore midis dy shteteve, e shprehu nevojën e intensifikimit të komunikimit në nivelin e lartë dhe më të lartë.
Në kontekst të procesit të anëtarësimit në Bashkimin Evropian, Presidentja Siljanovska Davkova e theksoi nevojën për hapjen e negociatave për anëtarësim, me qëllim të mobilizimit të institucioneve dhe fokusimit në reformat dhe standardet, veçanërisht në sundimin e të drejtës dhe luftën kundër korrupsionit.
Presidentja Siljanovska Davkova i theksoi pritjet nga pala maqedonase për një proces të drejtë të anëtarësimit në BE, i cili do të respektojë krenarinë kombëtare të qytetarëve tanë dhe do të zhvillohet në mënyrë që të mos e shqetësojë thellë ndjenjën e identitetit të tyre kombëtar.
