Sot në Kabinetin e Presidentit u mbajt seanca konstituive e përbërjes së re të Komisionit për Falje, pasi Presidentja Gordana Siljanovska Davkova mori vendim për përbërjen dhe për emërimin e kryetarit dhe anëtarëve të komisionit.
Kryetare e Komisionit për Falje u emërua dr. Millka Ristova, kurse anëtarë u emëruan prof. dr. Oliver Baçanoviq, prof. dr. Aleksandra Gruevska Drakulevski, prof. dr. Blerta Ahmedi, prof. dr. Dragana Batiq, prof. dr. Afet Mamouti, dhe mr. Doan Suleimanoski.
Në seancën e parë të përbërjes së re të Komisionit për Falje mori pjesë edhe Presidentja Siljanovska Davkova, e cila anëtarëve të Komisionit u uroi punë të suksesshme, duke shprehur bindjen se Komisioni me punën e vet, duke i respektuar parimet e transparencës dhe llogaridhënies, drejtësisë dhe barazisë, humanizmit dhe mirëkuptimit, do të kontribuojë në përforcimin e besimit institucional, kurse vendimet do të jenë shembull për respektim të vlerave demokratike.
Presidentja Siljanovska Davkova, duke e theksuar përkushtimin e saj për sundimin e ligjit dhe respektimin e të drejtave të njeriut, e theksoi rëndësinë e institutit të faljes dhe nevojën që e gjithë procedura të mos jetë objekt i grindjeve ditore politike.
Ajo shprehu pritshmërinë që të gjitha vendimet e Komisionit të jenë në përputhje me interesin publik dhe vlerat shoqërore, kurse secili rast të shqyrtohet me profesionalizmin maksimal, në suazat e procedurës së përcaktuar me ligj.
