Presidentja Siljanovska Davkova sot e mirëpriti zëvendësdrejtoreshën ekzekutive të Agjencisë së OKB-së për barazi gjinore dhe përforcimin e grave, UN Women, Njaraxai Gumbonzvanda
Në këtë takim u shkëmbyen mendime mbi përparimin e arritur në vend në aspektin e barazisë gjinore, efektivitetin e strategjive në luftën kundër dhunës gjinore, mundësitë për fuqizimin ekonomik të grave, rritjen e përfaqësimit të tyre në postet drejtuese, sfidat me të cilat ballafaqohen gratë nga bashkësitë e margjinalizuara, si dhe mbi bashkëpunimin me UN Women.
Bashkëbisedueset ranë dakord se pjesëmarrja e barabartë e grave në krijimin e politikave, si dhe në fushat e mbrojtjes, sigurisë dhe marrëdhënieve ndërkombëtare është thelbësore për zhvillimin gjithëpërfshirës dhe të qëndrueshëm. Në këtë kontekst, u theksua se pabarazia gjinore është më e dukshme në nivel lokal, ku gratë që synojnë për poste drejtuese ballafaqohen me barriera të shumta të cilat dalin nga vlerat patriarkale dhe stereotipat gjinorë. Njëkohësisht u theksua se janë të domosdoshme investime më të mëdha në programe që synojnë krijimin e një tregu më të drejtë të punës, përkatësisht barazinë dhe mundësitë e barabarta midis grave dhe burrave në tregun e punës.
Me qëllim të përparimit të barazisë gjinore dhe përmirësimit të statusit të gruas në të gjitha fushat e jetës publike dhe private, Presidentja theksoi se vendi do të vazhdojë të përafrojë plotësisht dokumentet strategjike kombëtare me Agjendën e Zhvillimit të Qëndrueshëm 2030 dhe me Qëllimin 5 për zhvillim të qëndrueshëm: Barazinë gjinore.
Në bisedën me Gumbonzvandën, Presidentja Siljanovska Davkova e theksoi përkushtimin e saj të plotë për ngritjen e vetëdijes për çështjet e barazisë gjinore dhe shprehu mbështetje për iniciativat të cilat e përmirësojnë statusin e përgjithshëm të grave në shoqërinë maqedonase. Ajo shprehu bindjen se bashkëpunimi i ngushtë me agjencitë e OKB-së dhe UN Women do të vazhdojë dhe do të thellohet edhe në të ardhmen, me qëllim sigurim të barazisë gjinore ndër detyrat prioritare të agjendës kombëtare.
