Presidentja Gordana Siljanovska Davkova sot u takua me drejtorin rajonal të Agjencisë së Kombeve të Bashkuara për Refugjatë për Evropë, Filip Leklerk dhe mori pjesë në shënimin e 30 vjetorit të vendosjes së marrëdhënieve diplomatike me UNHCR-në.
Në këtë takim, Presidentja dërgoi urime me rastin e përvjetorit, duke thënë se UNHCR-ja ka luajtur një rol kyç në mbrojtjen dhe mbështetjen e refugjatëve, azilkërkuesve dhe personave pa dokumente dhe identitet.
Në konfirmim të meritave dhe rolit të UNHCR-së, Presidentja e vuri në dukje çmimin “Dafina Olimpike”, nga djepi i paqes, Lëvizja Olimpike, të cilin këtë vit në hapjen solemne të Lojërave Olimpike në Paris e mori Komisionari i Lartë për Refugjatët i Kombeve të Bashkuara, z. Filipo Grandi i Komitetit Olimpik Ndërkombëtar.
Në bisedën me Leklerk, ajo shprehu mirënjohjen e saj ndaj UNHCR-së për bashkëpunimin prej tri dekadash me autoritetet maqedonase në fushën e promovimit të të drejtave të njeriut, mbrojtjen e refugjatëve, si dhe ndërtimin e një shoqërie gjithëpërfshirëse dhe e theksoi gatishmërinë për përforcimin e mëtejshëm të partneritetit dhe pjesëmarrjes në iniciativat humanitare rajonale dhe globale.
Presidentja është krenare që ka qenë pjesë e përbërjes parlamentare e cila i miratoi ndryshimet në ligjet përkatëse, me zbatimin e të cilave u zgjidh statusi i qindra personave pa dokumente dhe identitet, kryesisht refugjatë dhe jo rastësisht ajo mori mirënjohje të veçantë nga z. Filipo Grandi për rolin e saj pionier në mbrojtjen e refugjatëve.
Në kuadër të festimit të jubileut u mbajt diskutim mbi përvojat e kaluara të UNHCR-së dhe Qeverisë në lidhje me refugjatët dhe u hap ekspozita “Jetët Bardh e Zi”.
