Presidentja Gordana Siljanovska Davkova, sonte në Prilep, shpalli të hapur edicionin e 60-të të Festivalit të Teatrit Maqedonas “Vojdan Çernodrinski”.
Festivali përvjetor filloi me ekspozitën “60 Vjet Vojdan Çernodrinski – Prilep”, në kuadër të së cilës u vendosën objekte nga tradita e tij e gjatë në disa vende. Në këtë ceremoni, çmimet për arritje jetësore iu ndanë: regjisorit Sasho Milenkovski, aktorit të teatrit Lubomir Çadikovski, aktorit dhe pedagogut Atila Klinçe, dhe aktorit, regjisorit dhe pedagogut, Vebi Qerimi.
Edicioni i këtij viti i festivalit “Vojdan Çernodrinski” mbahet nën patronazhin e presidentes Siljanovska Davkova, të cilës iu dha mirënjohjeje gjatë ceremonisë së hapjes solemne.
Në fjalimin e saj, Presidentja Siljanovska Davkova uroi që ky përvjetor të mos jetë vetëm kthim në të kaluarën e pasur teatrale, por edhe provokim dhe nxitje për përralla të reja.
E nderuar Drejtoreshë e Festivalit “Vojdan Chernodrinski”, Ana Stojanovska,
I nderuar Ministër i Kulturës, Zoran Lutkov,
Të nderuar Kryetarë të Komunave, Deputetë, Artistë, Dashamirës të Artit të Teatrit,
Të nderuar miq,
Për gjashtë dekada, skena e Festivalit Teatror Maqedonas “Vojdan Çernodrinski” paraqet hapësirë për arritjet më të larta të artit teatror maqedonas. Prilepi ka parë gjenerata aktorësh, regjisorësh, dramaturgësh dhe krijuesish skenik të talentuar, bartës të roleve dhe shfaqjeve, të cilët vazhdojnë të jetojnë edhe pas rënies së perdes.
Nga katarsisi i lashtë aristotelian me të cilin përballet njerëzimi sot, përmes pasqyrës dramatike të Shekspirit, deri te Festivali i Çernodrinskit, teatri mbetet vend i rrallë ku njeriu, duke përfshirë edhe mua, përballet vullnetarisht me të vërtetën.
Në tragjedinë ndiejmë peshën e zgjidhjes, në komedinë çuditemi dhe qeshemi me dobësitë tona, në dramën njohim ngatërresat njerëzore, në grotesken përballemi me paradokset tona njerëzore.
Në këtë shtëpi, shtëpi të shenjtë, mijëra dialogë midis njeriut dhe ndërgjegjes janë zhvilluar në një gjuhë universale teatrale. Këtu, brenda këtyre mureve, mishërohet shpirti artistik, mësohet përmendësh fjala e aktorit, ngulitet gjuha e trupit tuaj.
Festivali “Vojdan Çernodrinski” paraqet simbol i energjisë krijuese, guximit artistik dhe kuriozitetit të pangopur për arritje të reja skenike që frymëzojnë, shpesh shqetësojnë, provokojnë, por edhe fisnikërojnë.
Sot, në kohë imazhesh të shpejta dhe kujtimesh të shkurtra, teatri na thërret jo vetëm të shohim, por edhe të ndiejmë dhe të depërtojmë në vetveten. A mund të na zgjojë një shfaqje dhimbjen ose të na kënaqë delirin? A mund ta zbulojë një aktor njeriun brenda nesh? Po.
Teatri lind njerëz të guximshëm, personalitete me dinjitet, integritet dhe erudicion. Dhe kur, nëse jo këtu, nëse jo tani, ku ajri mban erë teatri, siç thotë dramaturgu ynë i madh, Jordan Plevnesh.
Dëshiroj që ky përvjetor të mos jetë vetëm kthim në të kaluarën e pasur teatrale, por provokim dhe nxitje për histori të reja.
Jam e nderuar, po aq sa edhe laureatët. Është nder për mua të shpall të hapur edicionin jubilar, të 60-të, të Festivalit Maqedonas të Teatrit “Vojdan Çernodrinski”.
Qoftë i përjetshëm.
Ju faleminderit.
