E shtyrë nga dëshira për të mbrojtur Liqenin e Prespës, Presidentja Gordana Siljanovska Davkova, dje nga komuna e Resnjës, filloi serinë e vizitave nëpër qytetet dhe fshatrat maqedonase.
Para saj dhe kryetarit të komunës, Jovan Tozievski, në debatin në Oteshevë, më shumë se 15 përfaqësues të Ministrisë së Mjedisit dhe Planifikimit Hapësinor, UNDP-së, sektorit joqeveritar dhe institucioneve të tjera shtetërore dhe lokale shpjeguan arsyet e uljes alarmante të nivelit të ujit në Liqenin e Prespës. Bazuar në analiza dhe prova shkencore, ata theksuan ndryshimet klimatike, uljen e reshjeve të shiut dhe borës, fundosjet, si dhe përdorimin e tepërt të ujit për ujitje si faktorë kyç. Të pranishmit në këtë debat theksuan se tërheqja e Liqenit të Prespës nuk është vetëm një problem kombëtar, por edhe ndërkufitar.
Duke thesuar se rajoni i Prespës zotëron një bukuri të patëmetë që sjell një paqe të veçantë, Presidentja Siljanovska Davkova tha se të gjithë kemi detyrim ta trajtojmë natyrën si partner, sepse duke mbrojtur natyrën, ne mbrojmë veten.
“Unë besoj se ka zgjidhje, ato thjesht duhet të dëgjohen. Unë besoj se në një proces gjithëpërfshirës, të gjithë vendimmarrësit duhet të dëgjojnë mendimet dhe pikëpamjet e këtyre njerëzve të kualifikuar dhe të interesuar që jetojnë këtu dhe besojnë në të ardhmen e këtij rajoni. Ne të gjithë duhet të shfrytëzojmë veten për ta bërë atë që është e arritshme, vërtet një realitet, dhe jo vetëm një qëllim të dëshiruar”, shtoi presidentja.
Më parë, në Resnjë, ajo vizitoi Shtëpinë e Kulturës “Dragi Tozija”, e njohur si Saraji i Resnjës. Ndërtesa u ndërtua nga një nga udhëheqësit e Revolucionit të Turqve të Rinj, Ahmed Nijazi Bej, në fillim të shekullit të 20-të, dhe aty ndodhet dhoma përkujtimore e Keraca Visulçevës, ku janë ekspozuar disa nga vizatimet dhe pikturat nga puna e saj. Presidentja Siljanovska Davkova shprehu bindjen e saj se Nade Proeva, banore e Resnjës, historiane dhe profesoreshë e shquar maqedonase, do të marrë gjithashtu vendin e merituar në sarajin e lartpërmendur.
Ajo vizitoi gjithashtu shtëpinë përkujtimore të Tatarçevit, e cila strehon sende nga kjo familje e famshme, si dhe ekspozitën muzeale me figura dylli dhe shenja të tjera të një numri të madh figurash historike nga rajoni.
Gjatë vizitës, Presidentja Siljanovska Davkova u njoh nga afër me punën e fabrikës Swisslion Agroplod dhe u takua me kryetarin e komunës, Jovan Tozievski, anëtarët e Këshillit Komunal dhe qytetarët e Resnjës.
Duke theksuar se është një sfidë e madhe për të që të flasë me të rinjtë, të cilët sjellin energji unike, Presidentja Siljanovska Davkova dëgjoi mendimet dhe idetë e tyre se si të zvogëlohet emigrimi. Në këtë takim, ajo u pajtua me qëndrimin e të rinjve dhe kryetarit të kësaj komune se një strategji shtetërore është e nevojshme për t’i mbajtur të rinjtë këtu, në shtëpi.
“E di që Resnja ka një të ardhme të bukur, vetëm se ka nevojë për pak ndihmë. Përmes projektit “BE për Prespën”, po investohen fonde të konsiderueshme në zhvillimin e Resnjës, e cila është një nga komunat maqedonase me përfitimin më të madh nga fondet evropiane”, përfundoi Presidentja Siljanovska Davkova.
