Presidentja Gordana Siljanovska Davkova priti në takim Shefin e Delegacionit të Bashkimit Europian, Ambasadorin Michalis Rokas, i cili ia dorëzoi Raportin e Progresit të Komisionit Europian për vitin 2025.
Ambasadori Rokas vuri në dukje problemet kryesore me të cilat përballemi, si dhe ndryshimet e pritura.
Bashkëbiseduesit kanë konstatuar mungesën e progresit në sundimin e ligjit, luftën kundër korrupsionit dhe krimit, si dhe në gjyqësor, duke theksuar nevojën për përpjekje maksimale sa i përket reformave në këto fusha.
Në këtë takim u përshëndetën rezultatet pozitive në kuadër të Planit të Rritjes, reformës së administratës publike, si dhe sukseset në Klasterët 3, 4, 5 dhe 6.
Presidenta Siljanovska Davkova ka pasur vërejtje lidhur me disa prej konstatimeve në Raport që i referohen Grupit 1. Ajo gjithashtu theksoi nevojën që evaluimi të bazohet në Kriteret e Kopenhagës dhe jo mbi kushtet politike me të cilat përballemi për dy dekada.
Për ambasadorin Rokas, momenti aktual është më i miri për hapa të guximshëm dhe vendimtarë lidhur me reformat, për shkak të vullnetit të shprehur hapur të udhëheqësve të BE-së për të mbështetur dhe ndihmuar integrimin europian të Maqedonisë.
