Претседателката Гордана Сиљановска-Давкова денеска во касарната „Страшо Пинџур“ во Петровец, преку видео-конференциска врска оствари разговор со припадници на Армијата упатени во мировни операции „КФОР“ во Косово, УНИФИЛ во Либан, АЛТЕА во БиХ, како и мисиите во Романија, Бугарија и во Латвија.
Во своето обраќање до мировниците и до нивните семејства Претседателката им посака убави новогодишни празници и среќна Нова година.
„Горда сум на нив, но подеднакво сум горда и на нивните прекрасни фамилии и дечиња. Им посакав работата да ја завршат успешно, верувајќи во нивната способност и решеност. Уживав во друштвото на членовите на нивните семејства, а особено на прекрасните дечиња за кои Министерството за одбрана подготви новогодишна програма“, истакна претседателката Сиљановска-Давкова по разговорот со припадниците на Армијата и средбата со членовите на нивните семејства.
Во продолжение е интегралниот текст од обраќањето на претседателката Сиљановска-Давкова.
Не можам a да не го повторам она што веќе го кажав во Собранието. Јас сум горда на Aрмијата. Не сум милитантен лик, миротворка сум, Гандиевка сум. Меѓутоа, она што го видов и за време на пожарите, она што го видов и за време на средбите, она што го гледам и читам од извештаите навистина ме уверува дека имаме армија, не само што е во рамките на НАТО, туку е почитувана aрмија. Горда сум и на овие луѓе, бидејќи се во миротворни мисии, но најгорда сум овде на нивните прекрасни фамилии и дечиња. Навистина, многу му благодарам на Министерот за одбрана, бидејќи ова што се случува овде ќе нѐ спои со нивните родители и мислам дека нема да има погорди од нив на своите татковци во мисиите. Но, најгорда на сите нив е државата Македонија. Заедно со мене ќе размениме мисла, убедена сум дека се во ред, убедена сум дека сè што прават, прават заради доброто на човештвото и кога некој е во мировна мисија, тоа треба навистина да се почитува. Треба да се цени и мислам дека сите тоа го правиме, најмногу јас.
Да си ја завршите работата професионално, дисциплинирано како што треба. Да се вратите здрави и живи, да бидете во постојан контакт со нас и со вашите семејства, да бидете сигурни дека во ваше отсуство ние ќе се грижиме за нив. Нашите мисли се со вас. Она што го правите навистина е за огромен респект. Од срце ви посакувам најубава 2025 година, вам, на вашите дечиња, на вашите семејства.
Ви благодарам.
