Сопругата на претседателот, Елизабета Ѓоргиевска при денешната посета на Битола го посети ОУ „Ѓорги Сугарев“ по повод прославата на матурата на учениците од Центарот за поддршка на учењето на деца со попреченост каде што со специјалните едукатори и рехабилитатори разговараше за тековните активности и одвивањето на наставата, додека учениците изведоа рецитации и танцувачка нумера. Во училиштето, сопругата на претседателот го посети и кабинетот за сензорна интеграција при што директорот на училиштето, Роберт Филиповски ја запозна со предизвиците со кои се соочуваат при реализирањето на активностите.
По повод отворањето на Школата за дијабетичари во oпштина Битола, г-а Ѓоргиевска оствари средба со Здружението на дијабетичари од oпштина Битола на којашто беше информирана за плановите за реализација на едукативната програма и важноста на едукацијата за превенирање, рано откривање и адекватен третман на ова заболување.
Сопругата на претседателот ги посети и студијата на дизајнерките и претприемачки „Le Brand“ на Лили Кадинска и „Minnimal“ на Марија Десанова и Билјана Силјановска, како дел од нејзините активности за поддршка на жените занаетчики и претприемачки во земјава. Во студиото на дизајнерката Лили Кадинска ѝ беше претставен процесот на изработка на различни креации и плановите за иднина, a дополнително беше информирана дека дел од приходите кои ги остварува при продажбата на некои од производите ги донира во фонд за поддршка на жените жртви на насилство и самохрани мајки. Во ателјето на дизајнерките Марија Десанова и Билјана Силјановска ѝ беше претставена најновата колекција и беше информирана за иновативниот начин на произведување и продавање на облека. Во разговорите г-а Ѓоргиевска беше запозната со предизвиците со кои се соочуваат жените кои отпочнуваат и развиваат бизниси во земјата, како и потенцијалот кој го носи женското претприемништво за поддршка на економскиот развој на земјава.
Посетата на Битола, сопругата на претседателот ја заврши со посетата на кафетеријата „Улаф сте“ во Старата битолска чаршија којашто ја менаџираат лица со оштетен слух. Во неформалниот разговор со вработените, г-а Ѓоргиевска ја слушна нивната животна приказна која ги мотивира и другите да веруваат во себе и да креираат успешни приказни.
