Во посета на Кабинетот на претседателката Гордана Сиљановска-Давкова беа ученици и наставници од скопските основни училишта „Димитар Поп Георгиев – Беровски“ , „Киро Глигоров“, „11 Октомври“ и од училиштето „Драга Стојаноска“ од с. Долно Соње.
Гостите со голем интерес ја проследија свечената церемонија на менување на државното знаме, којашто традиционално се одржува секој втор петок во месецот од страна на Баталјонот за почести при македонската армија. Настанот е свечен чин на изразување почит кон македонското знаме, како еден од најважните државни симболи.
Учениците изразија голем интерес за претседателската функција и нејзиното извршување.
Со искреност и неочекувана зрелост, тие поставија сериозни прашања, небаре возрасни: зошто со децении сме имале само мажи на претседателската функција, дали ќе помогнам во обединувањето, дали ме сакале и дали ми недостигаат студентите, дали сум била одлична ученичка…
Но, сакаа да ,,ѕирнат” и во личниот свет на претседателката : нејзиното хоби, омилена книга, филм, љубов кон животните.
Претседателката им раскажа за новото милениче, македонското овчарско куче Караман, што неодамна стана дел од нејзиното семејство и им покажа негова фотографија.
Таа ги охрабри да учат, да читаат, да веруваат во силата на знаењето, доброто и љубовта, да крититикуваат, но да не навредуваат, да го почитуваат другиот и поинаквиот!
Децата ѝ подарија уникатни, рачно изработени подароци и ја поканија да ги посети нивните училишта.
