Претседателот Стево Пендаровски во рамки на проектот „Лице в лице со претседателот“ денеска го посети Кратово.
Претседателот Пендаровски беше пречекан од професорот по стручни предмети во угостителско – туристичката струка во средното училиште „Митко Пенџуклиски“, Младен Мицевски, кој со дел од неговите ученици пред претседателот презентираа рачни изработки во духот на македонската традиција, плетени изработки, столарски и грнчарски производи, како и јадења подготвени на традиционален кратовски начин.
Мицевски заедно со професорката по економски предмети Драгана Андреева Јакимова, настојуваат да ги откријат талентите на учениците и да ги мотивираат да ги преточат нивните вештини во креативни бизнис идеи. На тој начин, учениците ќе ги зачуваат вредностите на Кратово и промовирајќи го градот ќе придонесуваат за развојот на руралниот туризам.
Во разговорот со претседателот Пендаровски тие ја нагласија важноста од комбинирање на стручното образование и бизнисот, како и примената на традиционалните занаети следејќи ги современите модерни текови. Двајцата професори го информираа претседателот дека во моментов активно и ентузијастички работат со околу педесетина ученици, а покрај поттикнување на претприемништвото, нивните активности имаат и хумана димензија – дел од традиционалните изработки ги донираат на лица со попреченост.
Мицевски кој работејќи како туристички водич има голем придонес во афирмација и промоција на Кратово, на претседателот Пендаровски му го претстави и богатото културно – историско наследство и природните реткости на градот, познатите кратовски борови од 14 век, средновековната Саат-кула, старата Ајдучка чаршија, муралот на занаетчиите, како и муралот во чест Вања Лазарова изработен по повод 30 годишнината од нашата независност.
Во Кратово, претседателот Пендаровски ја посети и занаетчиската работилница на ковачот Мијалче Нушев, еден од малкутемина активни занаетчии во Кратово, кој ковачкиот занает го наследил од својот татко со желба да ја одржи традицијата.