Во рамки на Отворен Кабинет членови на Советот на млади на општина Гостивар и студенти од Архитектонски факултет, Универзитет „Св. Кирил и Методиј“ – Скопје, денеска го посетија Кабинетот на претседателот Стево Пендаровски.
За време на средбата со претседателот Пендаровски поразговараа за неговата работа и надлежности, а разменија и мислења за актуелните состојби во доменот на нивните кариерни и професионални интереси.
Во рамки на посетата на просториите на Кабинетот во коишто се реализираат официјалните и работните средби, се запознаа со историјатот на објектот и начинот на функционирање на институцијата. Во Мозаик салата го разгледаа импозантниот диптих „Македонија – светла земја“ и „Македонија земјата памети“ – дело на современиот уметник, академик Глигор Чемерски.
Во фоајето, студентите од архитектонскиот факултет имаа можност да ја разгледаат изложбената поставка „Лабораторија од минатото за иднината: Приказни за Летната школа по архитектура во манастирот Св. Јоаким Осоговски, 1992-2017“ со која, државата се претстави на Венециско биенале 2023.
Отворен Кабинет континуирано овозможува директни средби на граѓаните со претседателот Стево Пендаровски. Досега Кабинетот го посетиле илјадници граѓани од различни возрасти и занимања, студенти од земјава и од странство, како и ученици од основни и средни училишта од земјава.
