Presidentja Gordana Siljanovska Davkova u takua me zëvendëskryetarin e Qeverisë dhe ministrin e Transportit, Aleksandar Nikolloski.
Presidentja Siljanovska Davkova e përshëndeti aktivitetin intensiv të infrastrukturës, si përgjigje ndaj nevojës për lidhje më të mirë të brendshme dhe rajonale, si dhe lidhje me BE-në.
Në infrastrukturën moderne, ajo sheh bazë për zhvillim më të shpejtë ekonomik, si dhe rritje të investimeve vendase dhe të huaja.
Ministri Nikolloski e informoi Presidenten mbi ndërtimin e rrjetit rrugor dhe hekurudhor, si dhe për aktivitetet për përmirësimin e transportit publik.
Të dy shprehën pritshmërinë e tyre se projektet strategjike në sektorin e transportit do të kontribuojnë në përmirësimin e standardit të jetesës së qytetarëve dhe në mundësimin e zhvillimit të qëndrueshëm.
Në këtë takim u bisedua edhe mbi ndryshimet e fundit të Ligjit për planifikimin urbanistik. Sipas ministrit, shumica prej 68 votash “pro” flet për një shkallë të lartë përputhshmërie midis deputetëve.
Me ndryshimet ligjore për instalimin e termocentraleve fotovoltaike dhe turbinave me erë, ai nuk sheh rrezik të shtuar për tokat pjellore dhe beson se ka mekanizma ligjorë për ta parandaluar.
