Presidentja Gordana Siljanovska Davkova, sot, me rastin e 26 korrikut – Ditës së solidaritetit dhe kujtimeve nga tërmeti katastrofik i Shkupit në vitin 1963, vizitoi Kryqin e Kuq të Republikës së Maqedonisë së Veriut.
Gjatë vizitës, Presidentja Siljanovska Davkova mori pjesë në prezantimin – Aktivitetet e Kryqit të Kuq gjatë tërmetit në Shkup 1963 dhe mbajti takim me vullnetarët dhe menaxhmentin e kësaj organizate humanitare. Nëpërmjet video-linkut ndoqi një pjesë të aktiviteteve të tyre në Qendrën e Dhurimit të Gjakut, Qendrën për Shëndet Mendor dhe Mbështetje Psikosociale dhe Qendrën e Kujdesit.
Udhëheqësia e Kryqit të Kuq e informoi Presidenten për kapacitetet e organizatës, për tendencën në rritje të aktiviteteve vullnetare, si dhe për iniciativat dhe përkushtimin në promovimin e solidaritetit dhe vullnetarizmit humanitar, si model i qëndrueshëm me përfitime të shumta individuale dhe kolektive.
Vullnetarët e Kryqit të Kuq e njohën Presidenten Siljanovska Davkova me angazhimet e rregullta në mbështetje të grupeve vulnerabile, mbrojtjen e jetës dhe shëndetit të qytetarëve dhe përmirësimin e gjendjes së përgjithshme sociale në shoqëri, dhe në bisedë aktivistët humanë treguan angazhimet e tyre personale që ishin nxitje dhe frymëzim për t’iu bashkëngjitur Kryqit të Kuq.
Në këtë takim, Presidentja Siljanovska Davkova tregoi kujtimin e saj për tërmetin e Shkupit dhe ditët pas tij, duke theksuar vlerën e vyeshme të solidaritetit dhe kontributin e vullnetarëve, të bashkuar në dëshirën e tyre të fortë për ndihmë dhe mbështetje. Në këtë drejtim, theksoi se shoqëria qytetare fuqizohet më shumë nëpërmjet punës vullnetare, duke vlerësuar se vullnetarizmi duhet të vendoset edhe në sistemin arsimor.
Gjatë vizitës, Presidentja Siljanovska Davkova nënshkroi aplikacionin për anëtarësim në Kryqin e Kuq, si një nga organizatat më të mëdha dhe më të rëndësishme vullnetare, si dhe e theksoi mbështetjen e saj të mëtejshme të parezervë për humanizmin si vlera më e lartë njerëzore dhe prioriteti kryesor i çdo shoqërie.
