Presidentja Gordana Siljanovska Davkova u takua me eurodeputetët Dan Barna (Renew, Rumani), Tijs Reuten (SD, Holandë), Matej Tonin (PPE, Slloveni) dhe Karlo Resler (PPE, Kroaci) në Parlamentin Europian në Bruksel.
Tema e bisedës ishte situata aktuale në procesin e integrimit europian të Maqedonisë, sfidat me të cilat përballet politika e zgjerimit të Bashkimit Europian, si dhe mundësitë për kapërcimin e stagnimit të gjatë në negociatat e pranimit.
Presidentja Siljanovska Davkova kujtoi statusin 21-vjeçar të vendit si kandidat dhe angazhimin e tij të vazhdueshëm ndaj integrimit europian, të mbështetur me reforma të rëndësishme.
Ajo theksoi veçanërisht përputhjen e plotë me Politikën e Përbashkët të Jashtme dhe të Sigurisë të Bashkimit Europian, si konfirmim i vendosmërisë së qartë gjeopolitike dhe mbështetjes së vazhdueshme për qëndrimet europiane.
Sipas saj, vullneti politik për progres nuk duhet të pritet vetëm nga vendet kandidate, por edhe nga vetë Unioni, i cili ka nevojë për zgjidhje krijuese për të kapërcyer stagnimin e gjatë, pa vënë në pikëpyetje identitetin kombëtar dhe kulturor maqedonas.
Bashkëbiseduesit kanë rënë dakord se vendi i Maqedonisë është në Bashkimin Europian, ku i takon natyrshëm, pavarësisht sfidave në këtë rrugë.
Për disa nga eurodeputetët, përvoja e vendeve të tyre konfirmon se procesi i pranimit mund të jetë i gjatë dhe i mbushur me kushte të vështira, ndërsa progresi mund të mos njihet gjithmonë.
Presidentja Siljanovska Davkova i falënderoi për mirëkuptimin e tyre dhe shprehu bindjen e saj se dialogu i vazhdueshëm dhe angazhimi i përbashkët mund të kontribuojnë në ripërtëritjen e dinamikës së zgjerimit, si investim strategjik në stabilitetin, sigurinë dhe unitetin e Europës.
