Presidentja Gordana Siljanovska Davkova sot e mirëpriti ambasadorin e Bosnjës dhe Hercegovinës, Dragan Jaqimoviq.
Në këtë takim u bisedua mbi marrëdhëniet e përgjithshme bilaterale të dy vendeve, mundësitë për bashkëpunim në disa fusha me interes të ndërsjellë, si dhe mbi nxitjen e bashkëpunimit rajonal në drejtim të ballafaqimit me sfidat e sigurisë rajonale dhe integrimeve evropiane.
Presidentja Siljanovska Davkova shprehu kënaqësinë për marrëdhëniet e shkëlqyera miqësore dhe bashkëpunimin ndërmjet dy vendeve, të cilat karakterizohen nga mirëkuptimi, mbështetja dhe respektimi i ndërsjellë. Ajo theksoi se ekziston interesi për thellimin e bashkëpunimit ekonomik duke shfrytëzuar mundësitë dhe potencialet për rritjen e tregtisë, si dhe për avancimin e mëtejshëm të dialogut politik.
Në takim, Presidentja Siljanovska Davkova e përshëndeti vendimin e Këshillit Evropian për hapjen e negociatave për anëtarësim me Bosnjë dhe Hercegovinën, kurse e theksoi edhe mbështetjen maqedonase për ruajtjen e sovranitetit dhe integritetit territorial në përputhje me Marrëveshjen e Paqes të Dejtonit. Ajo theksoi se mbështetja jonë për aspiratat evropiane dhe euroatlantike të Bosnjës dhe Hercegovinës do të vazhdojë, duke shprehur gatishmërinë tonë për shkëmbim të përvojave në këtë plan.
Në raport me bashkëpunimin rajonal, Presidentja theksoi se nevojitet të vazhdohet puna për përparimin e tij me qëllim që të ballafaqohemi me sfidat e sigurisë rajonale dhe integrimit evropian të rajonit.
